Ереван ҰҚШҰ елдері Әзербайжанмен қақтығыста Армения алдындағы міндеттемелерін орындамады деп санайды
Армения Сыртқы істер министрі Арарат Мирзоян Минскіге ТМД Сыртқы істер министрлері кеңесінің кезекті кездесуіне бармайды. Бұл туралы аталған ведомствоның баспасөз қызметі мәлімдеді, деп хабарлады Sarbaz.kz.
«Арарат Мирзоян 12 сәуірде Минскіде ТМД-ға мүше елдердің Сыртқы істер министрлері кеңесінің отырысына қатыспайды», - деді Армения СІМ баспасөз хатшысы Ани Бадалян.
Өткен жылдың қазан айында республика премьер-министрі Никол Пашинян Бішкектегі ТМД көшбасшыларының саммитіне қатысудан бас тартқан болатын.
Саясаткер Ресей мен Ұжымдық қауіпсіздік шарт ұйымының әскери блогы Ереванға қатысты одақтас ретіндегі міндеттемелеріне немқұрайлы қарады деп наразылығын білдірген.
2023 жылдың қарашасында Минскіде ҰҚШҰ басшыларының кездесуі өтті. Бірақ Армения басшылығы бұл шараны да назардан тыс қалдырды.
Осыдан кейін Ереван мен Мәскеу арасында шиеленіс артып келеді. Әсіресе, ҰҚШҰ мен шекара әскерлері арасындағы ынтымақтастық бөлігінде. Ақпан айында Пашинян өз елінің ҰҚШҰ-ға қатысуын іс жүзінде тоқтатқанын мәлімдеді. Саясаткер мұны блок елдері Әзербайжанмен қақтығыста Ереван алдындағы міндеттемелерін орындамағандығымен түсіндірді.
Мәскеумен және оның әскери блоктарымен ынтымақтастықтың төмендеуі аясында Армения Еуропаға бағыт алды. Наурызда Сыртқы істер министрлігі елдің Еуропалық Одақтың бір бөлігі болғысы келетінін хабарлады. 5 сәуірде ЕО, АҚШ және Армения өкілдерінің кездесуі өтті.
