Асхаб Успановтың анасы ұлының лаңкестік оқиғаға қатысы жоқ екенін мәлімдеді
«Крокус Сити Холл» концерт залындағы шабуылдан кейін күдікті ретінде Мәскеуде ұсталған Шешенстанның тумасы Асхаб Успанов сол күні түнде бірнеше сағаттан кейін полиция бөлімінде қайтыс болды. Бұл туралы «Агенттік» басылымына оның анасы Таиса Успанова растаған. Оның қайтыс болғаны туралы шешеннің оппозициялық 1ADAT Telegram арнасы бірнеше күн бұрын жазды, деп хабарлайды Sarbaz.kz тілшісі.
Таиса Успанованың айтуынша, оның ұлы әйелінің жұмысына бара жатқанда ұсталған. Ұсталғаннан кейін Успанов жарына қоңырау шалып, бөлімшеге келмеуін өтінген. Ер адам еш жазығы болмағандықтан, полицияның оны көп ұзамай босататынына сенімді болған. Бірақ кейінірек ол келіншегіне қайтадан қоңырау шалып, оның бөлімшеге келуін өтінген. Қауіпсіздік қызметкерлеріне дөрекілік танытқанын айтқан.
Анасының айтуынша, Успановтың жары екі сағаттан кейін полицияға барған. Онда оған күйеуінің енді жоқ екені айтылған. Таиса Успанова ұлының Шешенстанда жерленгенін айтады. Бірақ оның денесі қалай және қашан берілгенін, азаптау іздері бар-жоғын және өлімнің себебі неде екенін ашып айтпады. Тек Асхаб Успановтың лаңкестік оқиғаға қатысы жоқ екенін жеткізді.
«Агенттік» Успановтың құрылыс саласында жеке кәсіпкер ретінде тіркелгенін анықтады.
«СПАРК» жүйесінің дерекқорында оның ЖК-сы 22 наурызда қайтыс болуына байланысты жойылған деп көрсетіліп тұр», - деп жазды басылым.
1ADAT Telegram арнасының хабарлауынша, Успанов жұмыстан кейін үйіне қайтып бара жатқанда автобус аялдамасында оған бетперде киген адамдар шабуыл жасаған. Ол қауіпсіздік күштері екенін түсінбей, қарсылық көрсеткен. Telegram арна жауап алу кезінде қауіпсіздік қызметкерлері ер адамның қабырғалары мен омыртқасын сындырғанын, сонымен қатар денесінде тұншықтыру іздері бар екенін мәлімдеді.
1ADAT сонымен қатар Успановтың денесі туралы бейнежазба жариялады. Онда қауіпсіздік күштерінің өз қылмыстарын жасыруға тырысып, Асхабтың өзіне қол салғандай етіп жасағанын айтады. Успановтың анасы «Агенттікке» оның ұлы мұсылман болғандықтан, өзін-өзі өлтіруі мүмкін емес екенін айтты.
Мәскеу маңындағы Красногорскідегі «Крокус Сити холлға» шабуыл 22 наурыз күні кешке болды. Қарулы адамдар ғимаратқа кіріп, автоматтардан оқ жаудырды, бірнеше жарылыс болды, өрт басталды. Соңғы мәліметтер бойынша, шабуыл кезінде 144 адам қаза тапты, тағы 551 адам зардап шекті.
«Крокус Сити Холлдағы» шабуылдан кейін ФСБ бұл іс бойынша күдікті 11 адамды ұстады деп мәлімдеді. Соттар он адамды, оның ішінде төрт тікелей орындаушыны қамауға алды. Отырыстарға олар азаптау іздерімен жеткізілді.
Шабуыл үшін жауапкершілікті «Ислам мемлекеті» террористік ұйымы өз мойнына алды. Сонымен қатар Ресей басшылығы Украинаның бұл шабуылға қатысы бар деп мәлімдеді. Ал Киев пен батыс елдері, соның ішінде АҚШ пен Германия бұл ақпаратты жоққа шығарды.
