Жүзге жуық адам жарақат алды
Пәкістанның оңтүстігінде пойыздың рельстен шығып кетуі салдарынан 30 шақты адам қаза тауып, жүзге жуық адам жарақат алды, деп хабарлайды Sarbaz.kz тілшісі BBC-ге сілтеме жасап.
Hazara Express пойызының бірнеше вагоны Карачиден шамамен 275 км қашықтықта орналасқан Навабшах қаласындағы Сахара теміржол станциясының маңында аударылды.
Жараланған жолаушылар жақын маңдағы ауруханаларға жеткізілді. Құтқарушылар адамдарды аударылған вагондардың астынан барынша аман алып шығуға тырысқан.
Елдің теміржол министрі Саад Рафиктің сөзінше, алғашқы тергеу пойыздың қалыпты жылдамдықпен жүргенін көрсетті. Тергеушілер апаттың неден болғанын анықтап жатыр.
Министрдің айтуынша, бірнеше нұсқаның арасында техникалық бұзылу немесе диверсия актісі бар.
Пәкістанның теміржол желісінде пойыз апаты жиі кездеседі.
Әлеуметтік желілерде тараған бейнежазбаларда апат болған жерде ондаған адам көрінген. Жолаушылардың кейбірі аударылған және мыжылған вагондардан өз бетінше шығуға тырысуда.
Карачидегі теміржол өкілі кем дегенде сегіз вагонның рельстен шығып кеткенін хабарлады.
Тірі қалған жолаушылардың бірі ВВС-ге жерде жатқан көптеген әйелдер мен балаларды көргенін айтты.
«Олар қиналып, айқайлады. Мен не істерімді білмедім. Жақын маңдағы каналдан су алып келіп, ес-түссіз жатқан адамдардың бетіне бүркідім. Олар есін жиятын шығар деп үміттендім», - деді Насыр Ахмед.
Насырдың өзі пойыз рельстен шыққан кезде вагон терезесінен құлап түсіп, аман қалыпты.
«Оянғанымызда біздің вагон төменге қарай ұшып бара жатқанын сездік. Бұл апокалипсис сияқты болды», - деді ұлымен бірге саяхаттаған тағы бір жолаушы Аслам.
Навабшах пен Синд провинциялары аудандарының негізгі ауруханаларында төтенше жағдай жарияланды.
Синд провинциясының ақпарат министрі Шарджил Мемон Үкіметтің зардап шеккендерге көмек көрсетіп жатқанын айтты. Апат орнындағы құтқарушыларға пойыз құрылымдарының арасынан сынықтарды бөлшектеуге және зардап шеккендерді шығаруға әскери құрылым қызметкерлері көмектесті.
Шенеуніктердің сөзінше, апат болған жерде құтқару жұмысы аяқталды.
Айта кетсек, 2021 жылы Синд провинциясындағы екі пойыздың соқтығысуынан 40-қа жуық адам қаза тауып, ондаған адам жарақат алған.
Жергілікті БАҚ-тың хабарлауынша, 2013-2019 жылдар аралығында мұндай оқиғалардан 150-ге жуық адам қаза тапқан.
