Бір зымыранның құны 4,4 миллион долларға дейін жетеді
Вашингтонның Украинаға жеткізілген Patriot кешендеріне арналған зымырандармен қамтамасыз ету мүмкіндіктері сарқылып жатыр, деп хабарлайды Sarbaz.kz The New York Times сайтына сілтеме жасап.
Басылым әрбір зымыранның құны 2,2 миллион доллардан басталып, 4,4 миллион долларға дейін тұратынын атап өтті.
4 қаңтарда АҚШ Мемлекеттік департаментінің өкілі Мэттью Миллер Вашингтон Киевті әскери салада қажет болғанша қолдауды жалғастыратынын айтты. Бірақ көмек өткен екі жылдағыдай болмауы мүмкін.
Бұған жауап ретінде Украинаның Сыртқы істер министрі Дмитрий Кулеба қолдау азаймайтынын айтып, «қатты уайымдамауға» шақырды.
Желтоқсан айының соңында АҚШ Украинаға 2023 жылдың соңғы көмек пакетін берді. Онда әуе қорғанысы мен РСЗО жүйелеріне арналған оқ-дәрілер, 155 миллиметрлік және 105 миллиметрлік снарядтар, танкке қарсы кешендер және 250 миллион долларлық атыс қаруына арналған 15 миллион патрон болды.
