Тағы 24-і жараланды
ХАМАС тобы мен Израиль арасындағы қақтығыстың күшеюі басталғаннан бері Газа секторында БҰҰ-ның 79 қызметкері қаза тапты, деп хабарлайды Sarbaz.kz тілшісі БҰҰ-ның палестиналық босқындарға көмек көрсететін Таяу Шығыстағы агенттігінің баспасөз қызметіне сілтеме жасап.
«7 қазаннан бері БҰҰ-ның палестиналық босқындарға көмек көрсететін Таяу Шығыстағы агенттігінің 79 қызметкері қаза тауып, 24-і жараланды», - делінген агенттіктің баспасөз хабарламасында.
Агенттік сонымен қатар қазіргі уақытта Газадағы хабар-ошардың үзілуіне байланысты қызметкерлерінің көпшілігімен байланысу мүмкіндігі жоқ екенін хабарлады.
«Дәл қазір Газа секторында байланыс үзілді. Біздің команда мүшелерінің басым көпшілігімен байланысу мүмкін болмай отыр», - делінген БҰҰ агенттігінің Х әлеуметтік желісіндегі хабарламасында.
Агенттік дерегінше, бұл – 10 күн ішінде анклавтағы байланыстың үшінші рет үзілуі.
«Газа тұрғындары өздерінің жақындарынан және бүкіл әлемнен мүлдем ажыратылған», - деп қосты агенттік.
7 қазанда Газада орналасқан радикалды ХАМАС тобы Израильге шабуыл жасап, 1,4 мыңнан аса израильдік құрбан болды. Бұған жауап ретінде Израиль қорғаныс Армиясы ХАМАС-қа қарсы соғыс жариялады. Салдарынан 9 мыңнан аса палестиналық көз жұмды.
