Иранда хиджаб киюден бас тартқаны үшін киноға түсуге тыйым салынған актрисалардың ресми тізімі жарияланды, деп хабарлайды Sarbaz.kz тілшісі DW жаңалықтарына сілтеме жасап.

Бұл туралы Иран кино өнерін кәсіби бағалау және қадағалау басқармасы басшысының орынбасары Хабиб Иль Беги IRNA мемлекеттік ақпарат агенттігіне берген сұхбатында айтты.

Аталған тыйымның бұған дейін қаражат жұмсалып түсіріліп қойған кино актрисаларына қатысы жоқ. Алайда оларға жаңа киножобаларға түсуге рұқсат берілмейді.

«Шектеулерге байланысты бұл актрисалар бұдан былай кинодағы мәнсабын жалғастыра алмайды. Олардың бұрынғы туындылары қомақты қаражат салынып қойғандықтан, кинопродюсерлердің мүддесін қорғау мақсатында біртіндеп жарыққа шығады. Бірақ алдағы уақытта түсірілетін фильмдерге түсуіне тыйым салынады», - деді шенеунік.

Фильмге түсуге тыйым салынған актрисалардың «қара тізіміне» Баран Косари, Вишка Асайеш, Таране Алидусти, Катаюн Риахи, Пантеа Бахрам, Хенгаме Газиани, Пега Ахангарани және басқа танымал иран актрисалары кірді.