Жуырда Қ.И.Сәтбаев атындағы Қазақ ұлттық техникалық зерттеу университетінің Әскери істер институтында дәстүрлі Ашық есік күні өткізілді.
Бұл іс-шараның басты мақсаты – әскери білім беру саласының заманауи мазмұнын кеңінен таныстыру, болашақ талапкерлерге оқу бағдарламалары мен институттың ғылыми, оқу-әдістемелік және материалдық-техникалық базасы туралы толық ақпарат беру, сондай-ақ жастардың бойында отансүйгіштік пен әскери мамандыққа деген қызығушылықты арттыру болды.
Аталмыш іс-шараға университеттің басшылығы, әскери кафедраның профессорлық-оқытушылық құрамы, курсанттар, сонымен қатар Алматы қаласы мен басқа да өңірлердің мектеп бітіруші түлектері қатысты. Ашық есік күні қатысушыларға Әскери істер институтының құрылымдық бөлімшелері, оқу және тәрбие жұмысының ерекшеліктері, әскери тәртіп пен моральдық-психологиялық дайындық жүйесі туралы жан-жақты мәлімет ұсынылды.
Іс-шараны институт бастығы, генерал-майор Рысбаев Василий Несипкасиевич ашты. Ол өз сөзінде қазіргі кезеңде еліміздің қорғаныс қабілетін нығайту мен әскери кадрлар даярлаудағы жоғары оқу орындарының рөлі ерекше екенін атап өтті. Генерал-майор атап өткендей, техникалық және әскери білімнің интеграциясы – болашақ офицерлердің инженерлік ойлау қабілетін дамытуға, заманауи әскери технологияларды тиімді игеруге және ел қауіпсіздігін қамтамасыз ету ісіне жоғары деңгейде үлес қосуға мүмкіндік береді.
Әскери істер институтының миссиясы – елдің қорғаныс саласына қажетті білікті, техникалық тұрғыдан сауатты және моральдық тұрғыдан тұрақты әскери мамандар даярлау. Институт әскери білім беруді ұлттық қауіпсіздік жүйесінің ажырамас бөлігі ретінде қарастырады.
Ашық есік күні барысында институт басшысының орынбасарлары — запастағы полковниктер Швачко Вадим Валентинович, Баимбетов Қайрат Өмірбекұлы, Қайнарбаев Берік Бекбосынұлы, Акмаев Роман Махамбетович және Менаяқов Қанат Түгелұлы – қатысушыларға әскери кафедраның оқу жүйесі, тәртіп ережелері, әскери пәндердің ғылыми-тәжірибелік бағыттары мен оқу процесін ұйымдастыру ерекшеліктері жөнінде баяндама жасады.
Сондай-ақ, Әуе шабуылына қарсы қорғаныс циклінің бастығы, запастағы полковник Степаненко Олег Евгеньевич қатысушыларға қазіргі заманғы қорғаныс жүйелерін басқару әдістері мен әскери-техникалық пәндерді оқытудың инновациялық тәсілдері туралы толыққанды ақпарат берді. Ол әскери-инженерлік білімнің болашақ офицерлердің кәсіби әлеуетін арттырудағы маңыздылығын ерекше атап өтті.
Институттың профессорлық-оқытушылық құрамы – әскери және педагогикалық тәжірибесі мол жоғары білікті мамандардан тұрады. Іс-шара барысында қатысушыларға запастағы полковник Алиев Қанатбай, сондай-ақ подполковниктер Еримбетов Сүлеймен, Литвяк Николай және Қасымов Қуат жетекшілік ететін оқу бағдарламалары мен практикалық сабақтардың мазмұны таныстырылды.
Бұл оқытушылар әскери педагогика мен басқару саласында заманауи әдістемелерді қолдана отырып, курсанттардың аналитикалық және шешім қабылдау қабілеттерін дамытады. Оқу үдерісінде цифрлық технологиялар, әскери тренажерлар және симуляциялық модельдеу жүйелері кеңінен пайдаланылады.
Іс-шараның практикалық бөлігінде қатысушылар институттың оқу сыныптарын, тренажерлық кешендерін, атыс және тактикалық дайындық кабинеттерін, сондай-ақ әскери-техникалық құрал-жабдықтарын аралап көрді. Курсанттар мен оқытушылар бірлесіп әскери жаттығулардың үлгілік көрсетілімін ұйымдастырды. Көрсетілім барысында саптық жүрістер, әскери-тактикалық жаттығулар, қару-жарақ пен арнайы техниканың үлгілері, сондай-ақ әуе шабуылына қарсы қорғаныс элементтері таныстырылды. Бұл көріністер жастардың бойында тәртіп, ұйымшылдық және жауапкершілік сезімін қалыптастырып, әскери қызметтің маңызын нақты мысалдар арқылы көрсетуге мүмкіндік берді.
Ашық есік күні тек кәсіби бағдарлау іс-шарасы ғана емес, сонымен бірге патриоттық тәрбие мен азаматтық жауапкершілікті арттыруға бағытталған маңызды мәдени-білім беру шарасы болды. Қатысушылар Отанды қорғау борышының мәні мен әскери мамандықтың беделі жөнінде кеңірек түсінік алды.
Институт курсанттарының үлгілі тәртібі, әскери дайындық деңгейі және ұйымдасқан түрде әрекет ету қабілеті жастардың әскери ортаға деген қызығушылығын арттырып, олардың болашақ кәсіби таңдауларына оң әсер етті.
Ал, іс-шараның соңында институт өкілдері қатысушыларға әскери кафедраға қабылдау талаптары, оқу бағдарламаларының құрылымы және оқу барысында ұсынылатын әлеуметтік қолдау түрлері жөнінде кеңінен түсіндірді. Ашық есік күні еркін пікір алмасу және сұрақ-жауап форматында аяқталып, келушілерге әскери білім берудің ерекшеліктерін жан-жақты түсінуге мүмкіндік берді.
Жалпы алғанда, Қ.И.Сәтбаев атындағы Қазақ ұлттық техникалық зерттеу университетінің Әскери істер институтында өткен Ашық есік күні жоғары ұйымдастырушылық деңгейде болды. Бұл іс-шара еліміздің жастарында әскери қызметке деген қызығушылықты арттыруға, патриоттық рухты, азаматтық жауапкершілікті және кәсіби бағдарлануды қалыптастыруға бағытталған маңызды ғылыми-танымдық және тәрбиелік маңызы бар оқиға болды.
Иманғали Ұланұлы,
Қ.И.Сәтбаев атындағы Қазақ Ұлттық техникалық зерттеу университетінің әскери кафедрасының (Әскери істер институтының) Әуе шабуылына қарсы қорғаныс циклінің 223 взводының студенті