Сол сияқты қараша айында армиялық қоян-қолтық ұрыстан ТМД чемпионаты өтеді
Фотолар ашық дереккөзден
Алматыда «Қазақ күресінен» Тәуелсіз Мемлекеттер Достастығының алғашқы чемпионаты өтеді, деп хабарлайды Sarbaz.kz.
Мұндай шешім Душанбеде өткен Тәуелсіз Мемлекеттер Достастығына қатысушы мемлекеттердің Достастық армиялары Қорғаныс министрлері кеңесі жанындағы Спорт комитеттері басшыларының отырысы барысында қабылданды.
«Ұйым құрылған 24 жыл ішінде алғаш рет Алматыда 2024 жылғы тамыз айында қазақтың ұлттық күресінен ТМД-ның алғашқы чемпионатын өткізу туралы келісімге қол жеткізіліп отыр. Бұл бастамаға Мемлекет басшысы – Қарулы Күштердің Жоғарғы Бас қолбасшысы Қасым-Жомарт Тоқаевтың қазақ күресін қазақстандық қоғамда насихаттау және ілгерілету туралы тапсырмасын орындау негіз болды», – деп хабарлады Тәжікстанда өткен отырысқа қатысқан Қазақстан Республикасы Қорғаныс министрлігі Спорт комитетінің төрағасы – Орталық спорт клубының бастығы подполковник Арман Әбеуов.
Келіссөздер барысында келесі отырыстың күн тәртібіне Достастықтың қорғаныс министрлері кеңесі жанындағы әскери-қолданбалы спорт түрлерінің, сондай-ақ мәдени спорт түрлерінің тізбесін өзгерту және оған қазақтың ұлттық күресін қосу туралы мәселе енгізілді.
Бұдан бөлек алдағы қараша айында Астанада Қазақстан Республикасы Қорғаныс министрінің кубогі үшін армиялық қоян-қолтық ұрыстан ТМД чемпионатын өткізу туралы уағдаластыққа қол жеткізілді.