Мұнда курсанттар ғана емес, офицерлер де білім алады
Ақтөбеде Кеңес Одағының екі мәрте Батыры Талғат Бигелдинов атындағы Әскери институттың курсанттарына жаңа жатақхана берілді, деп хабарлайды Sarbaz.kz.
Жатақхананың ашылу салтанатына Қазақстан Республикасы Қарулы күштері Әуе қорғанысы күштерінің бас қолбасшысы авиация генерал-майоры Дәурен Қосанов пен Ақтөбе облысының әкімі Асхат Шахаров қатысты.
Әскери институт жеке құрамын құттықтаған өңір басшысы курсанттарға кәсіби білім алып, олардың болашақта Қазақстан армиясының офицерлік құрамын толықтыратынына сенім білдірді. Авиация генерал-майоры Дәурен Қосанов пен облыстық мәслихат депутаты Сергей Вишняк жатақхананың лентасын қиды.
Дәурен Қосанов болашақта Кеңес Одағының екі мәрте Батыры Талғат Бигелдинов атындағы әскери институтта курсанттар ғана емес, офицерлер де білім алатынын атап өтті.
Қорғаныс министрлігінің әскери қызметшілердің тұрғын үй жағдайын жақсартуға бағытталған жобалары шеңберінде салынған 280 орындық жаңа жатақхана ұшқыштар және инженерлік батальондардың курсанттарына, сондай-ақ әскери оқу орнында медициналық бағытта оқитын курсант қыздарға арналған. Жатақханада тұрмыстық үй-жайлар, сондай-ақ дәрігерлік-ұшу комиссиясы үшін персоналы және 45 орындық стационары бар медициналық пункт көзделген.