Жиналған қаражат медициналық техника сатып алуға жұмсалады
Алматыда 10 қыркүйек күні Charity Music Run қайырымдылық жарысы төртінші рет өтеді, деп хабарлайды Sarbaz.kz.
Іс-шараның басты ерекшеліктерінің бірі – жүгіру кезінде музыкалық сүйемелдеудің болуы. Шақырылған музыкалық топтар сахнада және тас жолының бойында орналасқан барлық орында өнер көрсетеді. Жарысқа кез келген адам қатыса алады. Тіпті 7 жастан 14 жасқа дейінгі балалар үшін 2 км қашықтық қарастырылған. 5, 10 және 21 км қашықтықтар да бар. 5 және 10 км қашықтықты скандинавиялық жаяу жүруге болады.
Қашықтықтың ұзақтығына байланысты жарысқа қатысу бағасы 3 мыңнан 9 мың теңгеге дейін өзгереді. Студенттер үшін 50% жеңілдік бар.
Қатысушыларды тіркеуден және демеушілік көмектен жиналған барлық қаражат Педиатрия және балалар хирургиясы ғылыми орталығы үшін қажетті медициналық жабдықтарды сатып алуға жұмсалады.
Жарыс осымен төртінші рет ұйымдастырылады. Алғаш рет 2018 жылы өткен болатын. Жиналған қаражат Педиатрия және балалар хирургиясы ғылыми орталығының жуынатын орны мен кір жуатын бөлмесін жабдықтауға жұмсалған.
2019 жылы жарысқа 1200 адам қатысып, жиналған қаражатқа орталықтың дюара онкологиялық бөлімшесіне сүйек кемігін трансплантациялау кезінде қажетті бағаналы жасушаларды сақтауға арналған медициналық жабдық сатып алынған.
Charity Music Run үшінші жарысы 2022 жылы өтті. Оған 1500-ден аса адам қатысты. Түскен қаражатқа медициналық көпфункционалды кереуеттер сатып алынды. Науқас балаға жайлы болатын бұл кереуеттер оңалту мен емдеуді жеңілдетеді.
Жарыстың негізгі мақсаты – онкологиялық аурулар проблемасына назар аударту, жүгіруді көпшілікке таныта түсу, салауатты ұлт қалыптастыруға үлес қосып, салауатты өмір салтын насихаттау, Алматы қаласының тұрғындары мен қонақтарын бұқаралық спортпен белсенді түрде айналысуға тарту.
2023 жылғы жарыс Алматы қаласының мерекесі аясында өтеді. Өтетін орны – Almaty Arena спорт кешені. Жарысқа қатысушы ретінде осы сілтеме арқылы тіркелуге болады.