2025 жылғы 25-28 маусым аралығында Ақтөбе қаласында өтіп жатқан XI халықаралық «Айбын-2025» әскери-патриоттық жастар жиынында Қазақстан Республикасы Қарулы Күштері Әскери-теңіз күштерінің атынан қатысқан «Жас теңізшілер» әскери-патриоттық клубының тәрбиеленушілері жоғары нәтиже көрсетті.
Жеке біріншілік бойынша 95 қатысушының арасынан көзге түскен Нұрбол Жиенбаев белтемірге тартылу сайысында 47 рет тартылып, ең үздік нәтижеге қол жеткізді. Ол аталған номинацияда бірінші орынды иеленді.
Сонымен қатар, командалық есепте «Жас теңізшілер» клубының командасы 19 команданың ішінен үздік үштікке еніп, жүлделі ІІІ орынды жеңіп алды.
Жеңімпаз Нұрбол Жиенбаев:
«Жеңіске жету үшін күн сайын дайындалдық. Бұл тек менің емес, бүкіл командамыздың жемісі. Бізді дайындаған жетекшіміз Болат Амангелдіұлына алғысымыз шексіз. "Жас теңізшілер" намысын әрқашан биік ұстаймыз», – деді.
Айта кетейік, биылғы «Айбын» жиыны Ұлы Жеңістің 80 жылдығы мен Кеңес Одағының Батыры, қазақтың қаһарман қызы Әлия Молдағұлованың 100 жылдығына арналды. Іс-шара жас буынды отансүйгіштікке тәрбиелеуде ерекше маңызға ие.