Мұндай тәжірибе жоғары оқу орындарын бітіргені туралы диплом беру кезінде қолданылып келеді
Биыл 140 мыңнан астам колледж түлектері QR-коды бар дипломдар алады, деп хабарлайды Sarbaz.kz сайтының тілшісі.
Оқу-ағарту министрлігінің мәліметінше, QR-код технологиясын қолдану жалған диплом жасаудан қорғауға және жұмыс берушілердің диплом түпнұсқалығын бірден тексеріп алуына мүмкіндік береді.
«QR-код дипломның түпнұсқалығын тексеруге мүмкіндік береді. Ол құжаттың иесі жайлы деректер, оқу орны туралы ақпарат пен Ұлттық білім беру деректер қорынан алынған құжат деректемелері көрсететін мемлекеттік интернет-ресурсқа сілтеме береді. QR-кодта түлекті сәйкестендіруге мүмкіндік беретін мәліметтерді қамтиды. Бітірушінің аты-жөні, ұйымның атауы, оқуға түскен, бітірген жылы, мамандығы мен біліктілігінің атауы, оқыту нысаны, дипломның сериясы мен нөмірі көрсетіледі», - деді оқу-ағарту вице-министрі Айбат Ілиясов.
Сондай-ақ 2023 жылдың 6 шілдесінен бастап беріле бастаған ТжКБ дипломдары цифрлық жеке және жүргізуші куәліктері секілді электронды үкімет порталындағы жеке кабинет немесе eGov электронды үкімет порталы мен eGov mobile қосымшасында немесе екінші деңгейдегі банктердің қосымшалары арқылы қолжетімді болады.
Мұндай тәжірибе жоғары оқу орындарын бітіргені туралы диплом беру кезінде қолданылып келеді.