Талдықорған қаласындағы Сайын Мұратбеков атындағы №9 орта мектеп базасында «Сардар» қалалық кешенді олимпиадасы өтті. Олимпиада Ұлы Отан соғысындағы Жеңістің 80 жылдығына орай өткізіліп отыр.
«Сардар» қалалық кешенді олимпиадасына қала мектептерінің 11 сынып оқушыларынан құралған сегіз команда қатысып, өз бақтарын сынады.
Ойынға әдістемелік нұсқаулық және төрешілік жасауға білім беру мекемелерінің алғашқы әскери және технологиялық дайындық пәні оқытушы-ұйымдастырушылары бекітілді.
Олимпиада алты кезеңмен өткізілді: «Теориялық кезең пәндер бойынша тестілеу: математика, физика, орыс тілі, қазақ тілі және алғашқы әскери дайындық пәндерінен тест», «Практикалық кезең: АК-74 автоматын жартылай бөлшектеу және жинау», «Саптық дайындықтан нормативтер тапсыру», «Дене дайындығын анықтау кезеңі: 3000 метрге жүгіру», «100 метрге жүгіру», «Кермеге тартылу».
– Шараның басты мақсаты – жаңа қазақстандық патриотизмді тәрбиелеу, салауатты өмір салтын насихаттау және дамыту бойынша жұмыстардың мазмұнын жетілдіру, өскелең ұрпақты патриоттылыққа тәрбиелеу, - деді алғашқы әскери және технологиялық дайындық пәнінің оқытушы-ұйымдастырушысы Асылбек Аязбаев.
Олимпиада ойыны да өз мәресіне жетіп, жалпы ойынның қорытындысы бойынша бірінші орынды Әлтайыр Қуанышбек, екінші орынды Дмитрий Қуатбаев, үшінші орынды Темірлан Нұрғалым иеленді. Жеңімпаз командалар мадақтама қағаздарымен, төс белгілерімен және кубоктармен марапатталды.
Жетісу гарнизонының баспасөз қызметі