Абай облысының Шүлбі кентінде «Алау» әскери-спорттық ойынының облыстық іріктеу финалы өтті. Әскери-спорттық ойынның финалына 70-тен астам мектеп оқушылары жиналып, өз аудандары мектептерінің намысын қорғады. Олар Семей, Аягөз қалалары, Абай, Ақсуат, Бородулиха, Жарма, Көкпекті және Мақаншы аудандарынан келген үздік командалар бақ сынасты.
«Алау» ойынының талаптары бойынша оқушылар саптық байқау, белтемірге тартылу – ұлдар үшін, арқада жатып денені көтеру – қыздар үшін, автоматты толық емес бөлшектеу және жинау, шығармашылық конкурс және өз елдімекенінің тарихи тұлғасы бойынша жобаны қорғау бойынша сынақтар өткізілді.
Екі күнге созылған «Алау» әскери-спорттық ойынының облыстық финалы кезеңінде жекелей және командалық есепте үздік нәтиже көрсеткен оқушылар мадақтама қағаздары және кубоктармен марапатталды. Үздік үштікте орындар келесідей орналасты: үшінші орын – Аягөз ауданының командасы, екінші орын – Ақсуат ауданының командасы және жүлделі бірінші орынды – Жарма ауданының командасы еншілеп, республикалық ойынға жолдаманы жеңіп алды.
Еске салайық, «Алау» әскери-спорттық ойынының республикалық кезеңі 2025 жылдың маусым айында Қарағанды облысында өтетін болады.
Абай өңірлік гарнизонының баспасөз қызметі