Қарағандыда әскерилер арасында өткен ауқымды жарыс ХХII Спартакиада аясында ұйымдастырылды. Бұл жарыста Астана өңірлік қолбасшылығына қарасты 10 әскери бөлімнің әскери қызметшілері бақ сынасты. Офицерлік үшсайыс және қарудан ату бойынша өткізілген сайыстарға қатысушылар өздерінің шеберліктерін дәлелдеп, ең мықты дегендері жеңіс тұғырына көтерілді.
Офицерлік үшсайысқа үш негізгі дисциплина кірді: жүзу, ату және жүгіру. Ерлер 300 метр қашықтыққа еркін жүзу стилінде жарысса, әйелдер 100 метр қашықтықта жүзді. Сонымен қатар, қатысушылар Макаров тапаншасынан ату мен 3000, 2000 және 1000 метр қашықтыққа жүгіруде де өзара сынға түсті.
Қарудан ату бойынша қатысушылар ПМ-3 және АК-3 жаттығуларын орындап, дәлдік пен сабырлылықтарын көрсетті. Бұл сайыстарда мергендіктің маңыздылығы талап етіледі. Нәтижесінде, офицерлік үшсайыс бойынша бірінші орынды 31775 әскери бөлімінің командасы жеңіп алды, екінші орынды 99275 әскери бөлімі, ал үшінші орынды 85510 әскери бөлімінің командасы иеленді. Қарудан ату жарысында да 31775 әскери бөлімінің қызметшілері бірінші орынға шықты. Екінші орынды 85510 әскери бөлімі, ал үшінші орынды 06708 әскери бөлімінің қызметшілері алды.
Жарыс жеңімпаздары мен жүлдегерлеріне марапаттарды әлем чемпионы, танымал боксшы Серік Сәпиев табыс етті. Сәпиев салтанатты шарада осындай жарыстардың армияның жауынгерлік қабілетін арттыру мен әскери қызметшілер арасында спорт мәдениетін дамытудағы маңыздылығын атап өтті. Қазіргі уақытта Қарағанды облысының дене шынықтыру және спорт басқармасын басқарып отырған Сәпиев спорттық жарыстардың тек мықтыларды анықтаумен шектелмей, әскери қызметшілер арасында достық, бірге жеңіске ұмтылу рухын қалыптастыратынын айтты.
– Мен әрдайым спорттың тек азаматтар үшін ғана емес, әскери қызметшілер үшін де маңызды екенін айтып келемін. Бұл жарыстар армияның күш-қуатын ғана емес, сонымен қатар шыдамдылығын, тәртібін және дәлдігін көрсетеді. Бүгін жеңіске жеткендер – тек үздік нәтижелерді көрсеткендер ғана емес, сонымен қатар барлық күш-жігерін және табандылығын осы сынақтарға салғандар, - деді Қарағанды облысының дене шынықтыру және спорт басқармасының басшысы Серік Сәпиев.
Ол сондай-ақ жеңіске деген ұмтылыс пен қиын сынақтарға дайын болу әрбір әскери қызметшіге қажетті қасиеттер екенін атап өтті. Мұндай шаралар айбынды армияның дене дайындығы мен моральдық рухын арттыруда маңызды қадам болып табылады.