Астана қаласында Ұлы Жеңістің 80 жылдығына арналған игі іс-шаралар басталып та кетті.
Атап айтқанда, жуырда қазақ халқының біртуар әйгілі мерген қызы, Кеңес Одағының батыры Әлия Молдағұлованың 100 жасқа толуына орай батырдың еңселі ескерткішіне жиналған қоғам қайраткерлері, жергілікті әскери басқару органдарының жеке құрамы мен олардың отбасы мүшелері тағы да басқа ұйымдардан жиналған дүйім жұрт салтанатты жағдайда тағзым етіп, батыр қыздың мүсініне гүл шоқтарын қойды.
Астана қаласы қорғаныс істері департаментінің бастығы полковник Ф.Құрманғажинов көпшілік алдында «Алдыңғы буынның ерлігіне құрмет көрсету арқылы жас Отан қорғаушылар тәрбиеленеді» деген жігерлі сөзін жеткізді.
Үрмелі әскери оркестрдің сүйемелдеуімен орындалған майдандық сазды әуендер жиналған жұрттың көңілін толқытты.
***
Сұрапыл соғыс жылдар шын емес пе,
Бес жылдың әрбір сәті мұң емес пе.
Қастерлі халқымыздың мерген қызы,
Жүзге толды, жазбасақ сын емес пе?!
Намысы мен қайратын жиып бойға,
Он жеті мен он сегіз, оны да ойла.
Жадымызда сақтаулы сұлу бейне,
Мылтықпен жауды көздеп тұрған бойда.
Аңыздары мәңгі есте қауымының,
Қорғаны ой-шұқыры, тау ығының.
Қанша жау қарша қыздан жер жастанды,
Ақтөбе, Хобда, Бұлақ ауылының!
Жағасынан жауының жұлқылаған,
Дұшпаны тізе бүкпей тыншымаған.
Он жетіде мергендер мектебінде,
Дәлдігімен арнайы мылтық алған!
Көздеп атса, болмаған қатесі оның
Ел кегі үшін жұмсаған әрбір оғын.
Бай тұқымы болған соң аталмаған,
Нұрмұхамет Сарқұлов әкесі оның!
Роза айтқан әнді ойласаң арасында,
Еркін өскен Қобданың даласында.
Мәңгілік өмір берген батыр қызға,
Не жазық Маржан асыл анасында?!
Өмірбаян осылай жатталмады,
Асқақтатты ел даңқын, дақ салмады.
Солақай саясаттың салдарынан,
Батырдың ата-анасы аталмады?!
Қалам алып, қысқаша келді жазғым.
Мұхитқа тамшы болсын қосып қалғым.
Әлия – ержүрек қыз бар әлемде,
Ерлігіне елінен мәңгі тағзым!
Марат Турабаев
Астана қаласы Байқоңыр ауданы қорғаныс істері басқармасы