«Шығыс» өңірлік қолбасшылығының 10810 әскери бөлімінде «Нүктелі алдын алу әдістемесі» негізінде құқық бұзушылықтардың алдын алу мақсатында түсіндіру сабағы болды.
Оған барлық санаттағы әскери қызметшілер қатысты. Аягөз гарнизоны әскери полиция бөлімі алдын алу бөлімшесінің бастығы әділет капитаны Руслан Сүтжанов, Аягөз аудандық ауруханасының психологы Жадыра Ахметова, Аягөз орталық мешітінің бас имамы Нұржан Ешенғазинов және аудандық полиция бөлімінің майоры Берік Атантаев баяндама жасады. Олар ішімдік пен есірткінің зардабы, психотропты заттарды заңсыз сақтау мен өткізу және жат ағымның әскери ортаға енуіне жол бермеу, отбасылық зорлық-зомбылықтың алдын алу, көлік құралдарын пайдалану қағидаларын бұзбау аясындағы заң талаптарын жеткізді. Әскерилер тарапынан қойылған сауалдарға жауап берді. Жеке құрамның назарына құқық бұзушылықтың алдын алуға бағытталған қысқа метражды бейнероликтер де көрсетілді.
«Аягөз гарнизонында әскери қызметшілердің салауатты өмір салтын қалыптастыру мен құқықтық танымдарын жетілдіру мақсатында жоспарланған сабақ жоғарғы деңгейде өтті. Түсіндіру сабағының негізгі мақсаты – әскери қызметшілер арасында құқық бұзушылықтардың алдын алу, әскери қызметтен жалтару, құмар ойындардан аулақ болу, өзіне-өзі қол жұмсау мен психотроптық заттарды өткізу және заңсыз дайындау тақырыбында жалпы құқықтық негіздерді түсіндіру. Кездесу барысында жеке құрамға кез келген құқық бұзушылықтың салдары үлкен қылмысқа әкеліп соғатындығы жеткізілді», - деді әділет капитаны Руслан Сүтжанов.
Алуа Искакова