«Астана» өңірлік қолбасшылығы әскерлері қолбасшысының қолдауымен, 06708 әскери бөлімі басшылығының ұсынысымен сарбаздар үй-жайы күрделі жөндеуден өткен болатын. Осы ретте, сап түзеген жеке құрам алдында сарбаздар үй-жайының салтанатты ашылу рәсімі болып өтті.
Биік мінберден сөз сөйлеген «Астана» өңірлік қолбасшылығы әскерлерінің қолбасшысы полковник Мақсұт Гусейнов: «Сарбаздарымыз үшін қолдан келгенше барлық жағдайды жасауға тырысудамыз. Заманауи құрылыс жоспарымен күрделі жөндеуден өткен сарбаздар үй-жайына қоныстануларыңызбен шын жүректен құттықтаймын! Жан-жақты жағдайы жақсарған сарбаздың Отан алдындағы борышына адал болып, жауынгерлік даярлықты жоғары нәтижелі жетістіктерге жететіндігіне сенімдімін!», - деп жүрекжарды лебізін жеткізді. Іс-шара барысында қолбасшы Мақсұт Құрманалиұлы сарбаздар үй-жайының лентасын салтанатты түрде кесіп берді. Келесі кезекте Приозерск гарнизонының бастығы полковник Дидар Савельев, 06708 әскери бөлімінің командирі подполковник Дамир Шарипов, Балқаш аудандық пайдалану бөлімінің бастығы майор Жомарт Сабиров және Приозерск гарнизонындағы Қарулы Күштер ардагерлері ұжымының төрағасы Тілек Кенжебеков құттықтау сөз сөйлеп, сарбаздарға зор табыстар тіледі. «Астана» өңірлік қолбасшылығы әскерлерінің қолбасшысы М.Қ. Гусейнов пен салтанатты жиын қонақтары әр қабатқа орналасқан сарбаздардың жатын орындарын көзбен көріп, олардың тұрмыстық қажеттілікке арналған бөлмелерімен танысты.
Думан Жұмашұлы