Ұлы Отан соғысының ардагері, Халық қаһарманы Әбдіғали Қаймолдинге «Белоруссияны неміс-фашист басқыншыларынан азат еткеніне – 80 жыл» төсбелгісі табыс етілді.
1921 жылы 30 маусымда бұрынғы Семей облысының Абыралы ауданына қарасты Ұзынбұлақ ауылында дүниеге келген Әбдіғали Қаймолдин соғысқа еріктілер қатарында 20 жасында аттанды. Сталинград түбіндегі шайқаста жаяу әскердің алдыңғы шебіндегі артиллериялық құрамда снарядтарды тасушы, кейін оқтаушы болып, танкіге қарсы 76 миллиметрлік зеңбіректерден атыс жүргізді. 1942 жылдың қыркүйегінде ауыр жарақат алып, үш ай майдандық госпитальде жатқанына қарамастан қайта майданға сұранды. Харковьті азат етуге, 1-ші Украина, 3-ші Беларусь, Балтық жағалауы майдандарында жауынгерлік қимылдарға, Польшадағы ұрысқа және Инстербург пен Кенигсбергті алуға да қатысты. Ұрыс даласында төрт мәрте жарақаттанған офицер соғыстан кейін де Рижск әскери округінде, Семей сынақ ядролық полигонында НКВД СМЕРШ қарсы барлау бөлімінің құрамында стратегиялық құпия объектіні қорғауды қамтамасыз етуге қызмет етті.
Отставкадағы подполковник Әбдіғали Қаймолдин – 103 жаста. Қарт солдатты Абай облысы ардагерлер кеңесінің төрағасы М.Алин, орынбасары А.Жұмағұлова, ғылым докторы З.Тоқаев, Семей қаласы ардагерлер кеңесінің төрағасы К.Бердікенов, полиция полковнигі Ж.Оразов, бастауыш ардагерлер ұйымының төрағасы А.Матаев және Абай облысы қорғаныс істері департаментінің басшылығы құттықтап барды.
Естеріңізге сала кетейік, Ұлы Отан соғысының ардагері Әбдіғали Қаймолдинге Мемлекет басшысы Қасым-Жомарт Тоқаевтың Жарлығымен 1941-1945 жылдардағы Ұлы Отан соғысында көрсеткен ерлігі, батылдығы, жанқиярлығы мен соғыстан кейін мемлекеттік және қоғамдық қызметке белсенді қатысқаны үшін 2023 жылы Халық қаһарманы атағы беріліп, Халық қаһарманының ерекшелік белгісі «Алтын жұлдыз» бен «Отан» ордені табыс етілген.
Алуа Искакова
Суретті түсірген автор