Даңқты қолбасшы, халық батыры Бауыржан Момышұлының туған күніне 114 жыл толуына орай Приозерск гарнизонындағы Қарулы Күштер ардагерлері ұжымының ұйымдастыруымен Қарағанды облысы білім басқармасының Приозерск қалалық білім бөлімінің «№1 жалпы білім беретін мектебі» коммуналдық мемлекеттік мекемесінде ерлік сабағы болып өтті.
Ерлік сабағына білім ошағының 10 «ә» сынып оқушылары тартылды. «Даңқты қолбасшы Бауыржан Момышұлы» тақырыбындағы ерлік сабағын сынып жетекшісі Джантасова Гүлназ Тынымбайқызы ашып берді. Заманауи интерактивтік тақта арқылы Ұлы Отан соғысының қаһарманы, Кеңес Одағының батыры Бауыржан Момышұлының өмірі мен ерлік жолына арналған деректі фильм көрсетілді. Іс-шара барысында Қазақстан Республикасы Қарулы Күштерінің ардагері, Қазақстан Республикасының Құрметті азаматы Кенжебеков Тілек Алшымбекұлы оқушыларды батыр Бауыржан Момышұлы жазған «Ұшқан ұя» кітабымен таныстырып, өзінің кітап парақтарын ақтарғандағы ойға түйгендерін жеткізіп берді. Ерлік сабағына 06708 әскери бөлімі командирінің тәрбие және идеологиялық жұмыстары жөніндегі орынбасары Қуандық Арыстанов пен Приозерск гарнизонындағы Әскери полиция бөлімшесінің әскери қызметшісі кіші сержант Құттымұрат Кубеев қатысты.
Приозерск гарнизонының баспасөз хатшысы Думан Жұмашұлы