Аягөз гарнизонының танк әскери бөлімінде қысқы оқу кезеңінің жауынгерлік даярлық жоспарына сәйкес басталған мамандық бойынша жеке дайындық сабақтары одан әрі жалғасуда.
Танк әскери бөлімінің жеке құрамы мамандықтар бойынша бірнеше топтарға бөлінді. Оларға дәріс жетекшілері ретінде тәжірибесі мол офицерлер мен сержанттар тағайындалды.
«Мамандық бойынша жеке дайындық сабақтарын өткізудегі негізгі мақсат – жауынгерлік әзірліктің деңгейін көтеру әрі әскери қызметшілердің мамандықтары бойынша білім сапасын арттыру. Сонымен қатар жеке құрамның лауазымына сәйкес міндеттерін оқу және жеке қаруы мен әскери техникасының мүмкіндіктерін, оны пайдалану тәртібін үйрену. Әскери бөлімнің барлық жеке құрамы сабақтарға түгел қатысып, әрбір әскери қызметші өз мамандығы бойынша сапалы білім алуда. Осындай сабақтардың нәтижелері алдағы уақытта өткізілетін оқу-жаттығуларында жақсы жетістіктерге жеткізеді деп сенемін», - деді танк әскери бөлімі командирінің жауынгерлік даярлық жөніндегі орынбасары подполковник Әділет Идришев.
Жеке дайындық сабақтары желтоқсан айының соңына дейін жалғасады. Мамандық бойынша дайындық аяқталғаннан кейін жеке құраммен оқу материалын меңгеру деңгейін анықтау үшін бақылау сабақтары өткізіледі.
Алуа ИСКАКОВА