Аягөз гарнизонындағы танк әскери бөліміне мерзімді қызметке еліміздің түпкір-түпкірінен шақырылған жас жауынгерлер үшін таныстыру жұмысы ұйымдастырылды.
Әскерге енді келген жас құрамға шағын мұражайда әскери бөлімнің тарихы баян етілді. Басшылық құрамы және жеке құрамның жауынгерлік даярлықтағы жетістіктері, есте қаларлық елеулі оқиғалар таныстырылды. Сарбаздар әскери техника орналасқан аллеяны да аралады. Әскери қару-жарақ пен ауыр ұрыс машиналарының шығу тегі, техникалық сипаттамалары туралы мағлұмат берілді.
«Бір жыл әскери борышымызды өтейтін әскери бөлімдегі шағын экскурсия барысында командирлеріміз әскери қару-жарақ түрлерін, мәдени демалыс орталығын, әскери бөлімнің мұражайы мен кітапхананы көрсетті. Өз басым әдеби кітаптарды көп оқығанды жақсы көретіндіктен, маған әскери бөлімдегі қызықты кітаптарға толы кітапхананың болғаны ерекше ұнады», - деді Ақтөбе облысынан шақырылған қатардағы Алтынбек Ырғызбаев.
Қазіргі уақытта жас сарбаздар жауынгерлік дайындықтың жоспарына сәйкес саптық, тактикалық дайындық сабақтарын, жалпыәскери жарғыларды оқып, әскердегі күн тәртібінің кестесіне үйреніп жатыр.
Алуа Искакова