Абай гарнизонындағы 44736 әскери бөлімінің жеке құрамы барлау құралдарының күшін қолдана отырып, оқу-жауынгерлік міндеттерді орындады.
Жауынгерлік әзірлік апталығында барлау құрылымдарының жауынгерлік әзірлігінің деңгейін және белгіленген уақытта жауынгерлік тапсырманы орындау қабілеттілігін тексеру мен бағалау мақсатында жеке құрам жауынгерлік дабылмен көтерілді. Арнайы мақсаттағы барлау құрылымдары жауынгерлік әзірліктің жоғары деңгейіне келтірілді. Бөлім әскерилері әскери автомобильді техникаға отырып, жауынгерлік тапсырмалар орындалатын ауданға жеткізілді. Роталарға бірдей тапсырма берілгенімен, ол түрлі аудандарда орындалды. Рота және топ командирлері картада жұмыс жасады. Әскерилер қозғалыс бағытына қарай белгіленген объектіні құпия іздеу және оның координаттарын анықтап, мәліметтерді радио арқылы беру тапсырмасын алды. Тапсырма берілген сәттен бастап координаттар туралы баяндалғанға дейін шектеулі уақыт берілді.
«Бүгінгі күні әскери бөлімнің жеке құрамы жауынгерлік жоспарға сәйкес жоғары жауынгерлік әзірлікке келтірілді. Бөлімшелер өз жиын алаңына шығып, бөлімше командирлері жауынгерлік тапсырма алды. Берілген тапсырмаларды жеке құрам сәтті орындады. Алдағы уақытты бөлім әскерилері кез келген жауынгерлік міндеттерді ойдағыдай орындауға дайын», - деді 44736 әскери бөлімі арнайы мақсаттағы барлау-шабуылдау ротасы командирінің орынбасары аға лейтенант Ержан Еркінов.
Қимылдарды пысықтау барысында далалық жағдайдағы жауынгерлік даярлықты күшейтіп, жеке құрамның кәсіби шеберлігін одан әрі арттыруға барынша ден қойылды. Сондай-ақ, әскерилерді жауынгерлік әзірліктің жоғары деңгейіне келтіру, барлау роталарының оқу-жауынгерлік әрекеті, жағдайға қатысты мәліметтерді жинақтау мен сараптау, шешім қабылдау, жан-жақты қамтамасыз етуді үздіксіз басқаруды ұйымдастыру бойынша командалық пунктегі әскери бөлім басқармасының жұмысы да тексерілді.
Алуа ИСКАКОВА
Суретті түсірген автор