Аягөз гарнизонындағы 10810 әскери бөлімінің мәдени демалыс орталығында қаладағы №6 мектептің 5-сынып оқушылары «Жас сарбаз» әскери-патриоттық қозғалысының қатарына өту үшін ант қабылдады.
20-ға жуық тәрбиеленуші Қазақстан Республикасының Конституциясы мен заңдарын қатаң сақтауға, патриоттық рухты биік қойып, Отанды қорғауға, оның мүдделерінің ержүрек әрі батыл қорғаушысы болуға уәде берді. Қонақтардың қолынан «Жас сарбаз» ұйымының тәрбиеленушісі екендігін растайтын куәлік алды. Сөз сөйлегендер «Жас сарбаз» әскери-патриоттық қозғалысының мақсаты – өскелең ұрпаққа әскери-патриоттық тәрбие беру, олардың Отанға деген сүйіспеншілік сезімін ояту, сонымен қатар әскери-патриоттық клубтар жасөспірімдерді ҚР Қарулы Күштеріне деген құрметін арттырып, әскери борышты өтеуге үндейтінін, әскерге дайындауға жігерлендіретінін айтты.
Ант қабылдау рәсіміне Ауғанстан соғысының және ҚР Қарулы Күштер ардагерлері, Аягөз аудандық қорғаныс істері жөніндегі біріктірілген бөлімінің қызметкерлері, ата-аналар мен оқушылар қатысты. Аягөз аудандық білім бөлімінің басшысы Нұрғали Әзімбаев, мектеп директоры Жанар Сапакова және 10810 әскери бөлімі командирінің бірінші орынбасары – штаб бастығы Асылбек Унтаков жүрекжарды лебіздерін білдірді. «Сіздерді «Жас сарбаздың» қатарына қосылуларыңызбен құттықтаймын! Отанымыз – Қазақстан Республикасының белді де беделді азаматтары, еліміздің патриоттары болыңыздар!», - деді Ауған соғысының ардагері Айтын Арқабаев.
Әскери бөлім мен мектеп арасындағы өзара ынтымақтастық меморандумы аясында өткен салтанатты шара көркемөнерпаздардың және «Әйгерім» би тобының мерекелік концертіне ұласты.
Алуа ИСКАКОВА