31 қазан – әскери байланысшылардың кәсіби мерекесі. «Байланыс барда – жеңіс қолда», Талдықорғандағы 54380 әскери бөлімінің әскери қызметшілері дәл осы ұранды ұстанған.
Әскери байланысшылардың жұмысы әскерлерге маңызды ақпараттарды жедел сондай-ақ, өз кезегінде жасырын түрде беру болып табылады. Дәл осы күні 1994 жылы Қорғаныс министрінің директивасына сәйкес, Қазақстан Республикасы Қарулы Күштері Бас штабының байланыс басқармасы құрылған болатын. Бүгінде байланыс әскерлерінің құрылғанына 30 жыл толып отыр.
Әскери байланысшылардың кәсіби мерекесі күні әскери бөлімде Ашық есік күні ұйымдастырылып, оған қаланың он мектебінен 350-ге жуық балалар келді.
Іс-шарада алдымен қонақтарды әскери бөлімді аралатып, ондағы байланыс құрылғыларымен таныстырып, оларды қалай қолдану керектігі және қатар қалай жұмыс жасайтындығы көрсетілді. Сонымен қатар балалар атыс қаруын да қолдарына алып тамашалады.
– Мұндай Ашық есік күндер болашақ Отан қорғаушылардың тәрбиесіне тигізер үлесі зор, өйткені олардың Отанды құрметтеуге, қорғауға деген сезімдері арта түсетіні сөзсіз, - дейді майор Асхат Оспанов 54380 әскери бөлім командирінің Тәрбие және идеологиялық жұмыстар жөніндегі орынбасары.
Жоғары әскери тәртіпті орнатуда жеткен жетістіктері үшін, сонымен қатар жауынгерлік және дене даярлығында үлкен жетістіктерге жеткені, өзінің қызметтік міндеттерін жоғары деңгейде орындаған үздіктерді әскери бөлім командирі полковник Бауыржан Жұмағұлов құттықтап, салтанатты түрде алғыс хаттар табыс етті.
Іс-шара соңы көркемөнерпаздардың патриоттық әндерінен концерттік бағдарламамен ұласты.
Жетісу гарнизонының баспасөз қызметі