Биыл Қазақстан халқы өзінің даңқты ұлы, Екінші дүниежүзілік соғыстың батыры Рақымжан Қошқарбаевтың 100 жылдық мерейтойын атап өтуде. Бұл тарихи оқиға ұлт тарихында елеулі орын алған тұлғаның ерлігі мен оның елге сіңірген еңбегін еске алуға, ұрпаққа өнеге етуге арналған. Рақымжан Қошқарбаев есімі ұлт мақтанышы болып қана қоймай, ел қорғаудағы адалдық пен батылдықтың символына айналды.
Рақымжан Қошқарбаев 1924 жылы 19 қазанда Ақмола облысының Тайтөбе ауылында дүниеге келген. Оның балалық шағы қиындықтар мен ауыртпалықтарға толы болды. Әкесі «халық жауы» атанып, қуғын-сүргінге ұшырағаннан кейін, Рақымжан балалар үйінде тәрбиеленді. Соған қарамастан, ол қиындықтарды жеңіп, қайсар мінезі мен батыл рухын көрсетті. Бұл қасиеттері кейін оның жауынгерлік жолында ерекше рөл атқарды.
1942 жылы Қошқарбаев Кеңес Армиясының қатарына шақырылып, алдымен әскери училищеде білім алып, кейін майдан даласына аттанады. Жас сарбаздың жауынгерлік жолы 1-Беларусь майданының 150-атқыштар дивизиясында басталды. Ол көп ұзамай өзінің батылдығы мен жанқиярлығы арқылы ерекшеленіп, командирлердің назарына ілікті.
Рақымжан Қошқарбаевтың аты мәңгі есте қалған ең маңызды оқиға – оның 1945 жылғы 30 сәуірде Берлин қаласындағы Рейхстагқа Жеңіс туын тігуі. Бұл сол кезеңдегі Кеңес Одағының фашистік Германияға қарсы күрестегі басты жетістіктерінің бірі болды. Қошқарбаев пен оның серігі Григорий Булатов қарша бораған жау оғынан өтiп, бірнеше сағат ішінде Рейхстагқа жетіп, ту тiктi. Бұл әрекет Екінші дүниежүзілік соғыстағы ең маңызды сәттердің бірі ретінде тарихқа енді.
Рақымжан Қошқарбаевтың ерлігіне қарамастан, оның аты ұзақ жылдар бойы ұмыт қалды. Бұл ерлікті Кеңес үкіметі толық бағаламағанымен, Тәуелсіз Қазақстан оның батырлығын лайықты дәрежеде мойындап, құрметтеді. 1999 жылы Рақымжан Қошқарбаевқа «Халық қаһарманы» атағы берілді. Бұл атақ батырдың жауынгерлік ерлігі мен Отан алдындағы ерен еңбегін елдің бағалауының белгісі болды.
Бүгінгі таңда Рақымжан Қошқарбаевтың 100 жылдығы – Қазақстан халқы үшін үлкен тарихи оқиға. Бұл мерейтой арқылы елдің жастары оның өмір жолын, ерлігін үлгі тұтады. Отан үшін күрес, жауынгерлік рух, елге деген шексіз сүйіспеншілік секілді қасиеттер қазіргі жас ұрпаққа үлкен өнеге.
Рақымжан Қошқарбаевтың есімі ел тарихында мәңгілікке сақталады. Оның батырлығы тек Жеңіс туын тігумен шектелмейді. Ол Отанды сүюдің, жауға қарсы тұрудың, қайсарлық пен табандылықтың шынайы үлгісін көрсетті. Бүгінде батырдың есімі еліміздегі көптеген оқу орындары мен көшелерге берілген, ал оның ерлігі туралы жазылған шығармалар мен естеліктер жас ұрпаққа патриоттық тәрбие беруде маңызды рөл атқарады.
Рақымжан Қошқарбаевтың өмір жолы мен ерлігі – Қазақстанның тәуелсіздігі мен тыныштығын сақтауға, елдің болашағын қорғауға бағытталған жас ұрпаққа аманат. Қошқарбаевтың батылдығы, қайсарлығы және Отанға деген адалдығы бүгінде әрбір қазақстандық үшін үлгі болып қала бермек. Оның ерлігі уақыт өткен сайын ел жадында жаңғыра түседі, ал оның есімі мәңгі есте сақталады.
Рақымжан Қошқарбаевтың 100 жылдығы – Қазақстан тарихында маңызды белес. Бұл оқиға батырдың өмір жолы мен ерлігін еске алу арқылы жас ұрпақтың патриоттық рухын көтеруге, елін қорғауға деген сүйіспеншілікті оятуға бағытталған. Қошқарбаевтың өмірі бізге ерліктің мәңгілік екенін, Отан үшін жасалған әрбір әрекет ұмытылмайтынын көрсетеді. Ол – Отанға деген адалдықтың, жауынгерлік рухтың және патриоттық сезімнің нағыз айнасы.
Рақымжан Қошқарбаев – ұлт батырларының арасындағы жарқын жұлдыз. Оның есімі еліміздің тарихында мәңгілікке қалатыны сөзсіз.
Д.Байсалбаев,
Талдықорған «Білім-Инновация» лицей-интернатының Алғашқы әскери және технологиялық дайындық пәнінің оқытушы-ұйымдастырушысы