Кейбір мәлімет бойынша, балалардың анасы оқиға орнында көз жұмған, әкесі ауыр халде облыстық аурухананың жансақтау бөлімінде жатыр
Фото ашық дереккөзден
Атырауда жол-көлік апатынан екі адам қаза тапты, деп хабарлады Sarbaz.kz.
Atpress.kz жазуынша, қайғылы оқиға 21 тамызда кешкі уақытта республикалық маңызы бар Ақтөбе – Атырау – Астрахань тасжолының 635-шақырымында болған.
«Атырау облыстық ПД баспасөз қызметінің мәліметінше, 21 тамызда сағат 19:30 шамасында Toyota Prada және Lada Granta көліктері соқтығысқан. Оқиға салдарынан Lada Granta көлігінің екі жолаушысы қаза тапты. Lada Granta көлігінің жүргізушісі мен Toyota Prada көлігінің екі жолаушысы облыстық ауруханаға жеткізілді», - делінген хабарламада.
Қазіргі кезде аталған дерек бойынша тергеу жұмыстары басталды.
Белгілі болғандай, ауруханаға жеткізілген екі жолаушы ата-аналарымен бірге апатқа ұшыраған жасөспірімдер болып шықты. Дәрігерлер олардың жағдайы ауыр деп бағалап отыр.
«Ағалы-қарындасты екі бала облыстық балалар ауруханасына жатқызылды. Жасөспірімдердің жағдайы ауыр деп бағаланып отыр. Олардың біріне кеше ота жасалды, екіншісіне бүгін ота жасалады, екеуі де жансақтау бөлімінде жатыр», - деді дәрігерлер.
Кейбір мәлімет бойынша, балалардың анасы оқиға орнында көз жұмған, әкесі ауыр халде облыстық аурухананың жансақтау бөлімінде жатыр.