Sarbaz.kz

Радиоэлектроника және байланыс әскери-инженерлік институты курсанттарының оқуды аяқтау рәсімі 28 панфиловшы-гвардияшылар саябағында өтті, деп хабарлайды Sarbaz.kz.

«Лейтенант» алғашқы офицерлік атағы 87 курсантқа берілді. Олардың бірі үздік дипломмен марапатталды. Түлектердің арасында Ұжымдық қауіпсіздік туралы шарт ұйымына мүше мемлекеттердің қарулы күштері үшін әскери кадрларды бірлесіп дайындау шеңберінде оқыған Қырғызстан өкілі де бар.

Іс-шараға Қорғаныс министрлігінің, Әуе қорғанысы күштері бас басқармасының, әскери және азаматтық жоғары оқу орындарының өкілдері, Қарулы күштердің ардагерлері, түлектердің туыстары мен жақындары қатысты.

Офицерлер алдында Қорғаныс министрінің орынбасары генерал-майор Шайх-Хасан Жазықбаев құттықтау сөз сөйледі. Ол басшылық пен оқытушылар құрамына алдағы күндері әскерлерде қызметін жалғастыратын жоғары дәрежелі мамандардың жаңа буынын дайындағаны үшін алғысын білдірді.

Оқуды аяқтау арқылы сіздер абыройлы қызмет пен кәсіби өсуге бастайтын мүмкіндікке ие болдыңыздар. Ең бастысы, институт қабырғасында ең заманауи білімге ие болып, әскери тұрғыдан өте жақсы дайындықтан өте алдыңыздар, – деп атап өтті ол.

Институт тарихында алғаш рет «радиоэлектрондық барлау және радиоэлектрондық күресті ұйымдастыру» біліктілігі бар офицерлер оқуды аяқтап отыр. Бұл саладағы мамандар қай уақытта да маңызды және сұранысқа ие болып қала бермек.

Біз осы біліктілігі бар алғашқы түлектер болғанымызды мақтан тұтамыз. Біздің біліміміз бен дағдыларымыз цифрлық технологиялардың қарқынды дамуы және жаңа киберқауіптердің пайда болуы жағдайында елді қорғау ісінде сұранысқа ие болады, – деп атап өтті жас түлектердің бірі Бекжан Дайырбай.

Қалыптасқан дәстүр бойынша іс-шара институттың Жауынгерлік туымен қоштасумен және салтанатты шерумен аяқталды.

Бұдан бөлек мерекелік іс-шараға қатысушылар болашақта жас отбасының шаңырақ көтеретініне куә болды. Дәстүрлі офицерлер вальсінен кейін түлектердің бірі сүйген қызына ұсыныс жасады.

Әскери институт өз тарихында 4 мыңға жуық офицер дайындап шығарды. Олардың барлығы өздерінің әскери міндеттерін абыроймен орындап, Қарулы күштер қатарында және басқа да әскерлер мен әскери құрылымдарда қызмет етіп жүр.

Айта кетейік, Радиоэлектроника және байланыс әскери-инженерлік институты Орталық Азиядағы радиотехникалық мамандық офицерлері мен байланыс офицерлерін даярлайтын алғашқы жоғары оқу орны болып табылады. Институт радиоэлектроника, радиотехника және инжиниринг, автоматтандыру және инфокоммуникациялық технологиялар, ақпараттық қауіпсіздік және киберқауіпсіздік жүйелері, әскери құрылыс сияқты салалардағы мамандарды оқытады.