Әскери қызметші емдеу мекемесіне түскен кезде оның денесінен көгерген немесе зақымдану іздері табылған жоқ
Қорғаныс министрлігінің баспасөз қызметі
Қорғаныс министрлігі Гвардейск гарнизонының әскери қызметшігі қатысты ресми хабарлама жариялады, деп хабарлайды Sarbaz.kz.
Бұқаралық ақпарат құралдары мен әлеуметтік желілерде Гвардейск гарнизонының әскери қызметшісін емдеу мекемесіне жатқызудың себебі туралы шындыққа сай келмейтін ақпарат тарауда.
Осыған байланысты Қорғаныс министрлігі бастапқыда әскери қызметші медициналық бөлімге өзін әлсіз сезініп, қызуы көтерілгені туралы шағымдармен жүгінгенін хабарлайды.
Медициналық тексерістен кейін ол Гвардейск гарнизонындағы әскери госпитальдің жұқпалы аурулар бөліміне жеткізіліп, әскери қызметшіге екі жақты полисегментті пневмония диагнозы қойылды. Бұдан кейін ол шұғыл түрде Жамбыл облысы Қордай ауданының орталық ауруханасына ауыстырылды. Бүгінгі күні науқастың жағдайы ауыр деп бағаланып отыр. Қазір оған барлық қажетті медициналық көмек көрсетілуде. Сонымен бірге онда Қорғаныс министрлігі әскери клиникалық госпиталінің құрамына анестезиолог, реаниматолог және терапевт дәрігерлер кіретін көшпелі бригадасы жұмыс істеп жатыр. Айта кетейік, әскери қызметші емдеу мекемесіне түскен кезде оның денесінен көгерген немесе зақымдану іздері табылған жоқ. Сондықтан бұқаралық ақпарат құралдары өкілдері мен азаматтардан тек ресми ақпарат көздеріне сенуді сұраймыз, – делінген хабарламада.