Екі ел де Украинаға қарсы әскери операциялар кезінде Ресейге әртүрлі қару түрлерін жеткізген деп айыпталған
Lukasz Kobus/European Union
31 мамырда Еуропалық Одақ Кеңесі Ресейге қару-жарақ жеткізуге қатысы бар Иран мен Солтүстік Кореяның жеке және заңды тұлғаларын қоса алғанда, санкциялар тізімін кеңейтті.
Тиісті мәлімдеме ЕО кеңесінің сайтында жарияланды. Жаңа тізімге Солтүстік Корея мен Ираннан алты жеке және үш заңды тұлға қосылды.
КХДР өкілдеріне қарсы санкциялар олардың «заңсыз қару-жарақ бағдарламаларына қатысуы және Ресейдің Украинаға қарсы агрессивті соғысын қолдауымен» байланысты. Иран өкілдеріне «Ресейдің Украинаға қарсы агрессивті соғысы үшін ұшқышсыз ұшақтарды бергені және Таяу Шығыс пен Қызыл теңіз аймағында ұшқышсыз ұшақтар мен зымырандарды жеткізгені үшін» санкциялар салынды.
Сондай-ақ Иран Израильге зымырандық шабуылға және Йемен мен Сириядағы радикалды топтарға көмек көрсетуге жауапты.
ЕО санкцияларының жаңартылған тізімдеріне мыналар кіреді:
Иранның қорғаныс министрі Мохаммадреза Аштиани
Ислам революциясы Сақшылар корпусы Құдс күштерінің қолбасшысы Исмаил Каани
Авиация индустриясы ұйымының басшысы Афшин Хаджи Фард
Kavan Electro, оның топ-менеджментінің екі өкілімен бірге дрондарды өндіруге арналған компоненттерді сатып алу және сатумен айналысатын компания
КХДР өкілдерінің аты-жөні көрсетілмеген, бірақ олардың активтері мен қаражаты немесе экономикалық ресурстары тоқтатылатыны, сондай-ақ Еуроодақ елдеріне баруына тыйым салынатыны хабарланды.
Сонымен қатар, Ресей Приморск өлкесінің губернаторы Олег Кожемяко мен ресейлік «Шығыс Стивидор компаниясы» Еуроодақтың санкцияларына ұшырады. Кожемякоға Солтүстік Корея басшысы Ким Чен Ынның 2023 жылдың қыркүйегінде Ресейге сапарын ұйымдастырды және оған БҰҰ санкцияларымен тыйым салынған қару-жарақ тапсырды деген айып тағылды.