Қазіргі уақытта қырғыз-тәжік секторындағы жағдай тұрақты деп сипатталады
economist.kg
Мемлекеттік шекараның Қырғызстан-Тәжікстан учаскесінде атыс қаруын қолдану оқиғасы болды, деп хабарлайды Sarbaz.kz 24.kg сайтына сілтеме жасап.
Шекара қызметінің ақпарат және коммуникациялар басқармасының хабарлауынша, шамамен сағат 12:20-да Баткен облысы Лейлек ауданы Ақ-Босого ауылы маңында Қырғызстан шекарашысы Тәжікстан азаматтары – шопандарды байқаған. Олар Қырғыз Республикасының аумағында мемлекеттік шекара сызығынан 250-300 метр қашықтықта мал баққан.
Тәжікстан азаматтары шекарашылардың Қырғызстан аумағынан шығып кету талаптарын елемей, әскери қызметкерлерге тас лақтыра бастады. Шопандардың бірі Қырғыз Республикасының шекара наряды бағытында бірнеше рет оқ атқан.
Жағдайдың ушығуына жол бермеу үшін Қырғызстан шекарашылары ескерту ретінде аспанға оқ атқан, содан кейін шопандар Тәжікстан аумағына қашып кеткен.
Қырғыз Республикасының шекарашылары арасында зардап шеккендер жоқ. Расталмаған мәліметтер бойынша, Тәжікстан Республикасының бір азаматы аяғынан жарақат алған.
Алайда жарақаттың нақты қай жағдайда, қашан және қай жерде алынғаны белгісіз, өйткені Тәжікстанның құқық қорғау органдары фото ғана ұсынды, – деп атап өтті Шекара қызметі.
Тараптардың шекара өкілдерінің кездесуі күтілуде. Қазіргі уақытта қырғыз-тәжік секторындағы жағдай тұрақты деп сипатталады.