Sarbaz.kz

Университеттің вице-президенті Мэри Осако лагерьде «бүгін түнде жан түршігерлік зорлық-зомбылық әрекеттері болғанын» және билік құқық қорғау органдарын шақыруға мәжбүр болғанын айтты, деп хабарлайды ВВС.

Қақтығысқа нақты не себеп болғаны әзірге белгісіз, бірақ кейбір мәліметтерге сәйкес, наразылық білдірушілер студенттердің екі тобы арасында «буферлік аймақ» құрған бөгетті аударып тастаған.

Әлеуметтік желідегі кадрларда адамдардың палестиналық студенттердің шатыр лагеріне заттар мен шамдарды лақтырып жатқаны көрсетілген.

Лос-Анджелес әкімдігі қалалық полиция департаменті офицерлерді университетке жібергенін хабарлады. Кампуста полиция қызметкерлерінің түсірілімі пайда болды. Лос-Анджелес полициясы офицерлердің университет шенеуніктері «заңсыз митинг» туралы хабарлаған соң кампусқа жіберілгенін растады.

Калифорния университетінде болған Daily Bruin газетінің тілшісі Дилан Винвардтың айтуынша, израильді жақтаушылар жергілікті уақыт бойынша кешкі сағат 22:00 шамасында әртүрлі заттарды (су бөтелкелерін, файерларды, тіпті біреудің скутерін) лақтыра бастаған. Журналист BBC-ге ауада көзден жас ағызатын газдың иісі сезілгенін айтты.

Винвард университеттің күзетшілері бұдан былай буферлік аймақты «қауіпсіз ұстай» алмайтындығына сенгендіктен аймақты тастап кеткенін айтты.

Айта кетейік, сейсенбі күні кешке АҚШ полициясы Нью-Йорктегі Колумбия университеті ғимараттарының біріне басып кірді, себебі оны палестиналықтарды қолдаған демонстранттар басып алған еді.

Бірнеше жүз полиция қызметкері Гамильтон Холлға терезе арқылы арнайы платформаны пайдаланып кірді. Америкалық БАҚ полицияның 50-ге жуық демонстранттарды тұтқындағанын хабарлады. Оларды қолдарын байлап ғимараттан шығарып, автобустарға отырғызды.

Бір күн бұрын Гамильтон Холлды палестиналықтарды қолдап, Израильдің Газа секторындағы әрекеттеріне қарсы демонстранттар басып алғаннан кейін университет әкімшілігі полициядан көмек сұрады.

Университет құқық қорғау органдарына жолдаған хатта ғимаратқа бір топ студент кіргеннен кейін наразылық білдірушілер бақылауына алғаны айтылған. Сосын шеруге шыққандардың бірі есікті ашып, пікірлестерін ішке кіргізді.

Полицияның хабарлауынша, наразылық білдірушілер ғимарат ішінде бөгет жасап, қауіпсіздік камераларын сындырған.

Полицияға хатқа қол қойған Колумбия университетінің басшысы Немат Шафиктің айтуынша, бұл әрекеттерді «университетпен байланысы жоқ адамдар басқарды». Шафик демонстранттар университетке тиесілі ғимаратта заңсыз тұрып, оны бұзып жатқанын айтты.

Нью-Йорк мэрі Эрик Адамс та наразылық акциясына Колумбия университетінің студенттері ғана қатысып жатқаны туралы айтты. Оның айтуынша, Гамильтон Холлды басып алуды «сыртқы үгітшілер» ұйымдастырған.

Алайда наразылық акциясын ұйымдастырушылардың бірі, Колумбия университетінде оқитын палестиналық ғалым Махмуд Халил Reuters агенттігіне наразылық кезінде бейтаныс адамдар болмағанын айтты. «Бұл студенттер», - дейді ол.

Колумбия университетінің кампусында екі аптадан бері палестиналықтарды қолдаған наразылық шерулеріне қатысушылар тұратын шатырлы лагерь бар.

Колумбия университеті Америка Құрама Штаттарында бірінші болып Газадағы соғысқа қарсы наразылық акциясын бастады.

18 сәуірде мектеп басшысы Конгресс алдында кампустағы антисемитизм мәселесі туралы куәлік бергеннен кейінгі күні лагерьде наразылық білдірушілер саны күрт өсті.

Университет әкімшілігі полициядан араласуды сұрап, 100-ден астам демонстрант қамауға алынды.

Палестиналықтарды қолдауға арналған шерулер Американың басқа да көптеген университеттерінде, соның ішінде Техас, Калифорния, Джорджия, Солтүстік Каролина және т.б. Осы оқу орындарының қалашықтарында полиция наразылық акциясына 1 мыңнан астам қатысушыны қамауға алды.

Бұл арада кейбір америкалық еврей студенттері Израильдің Газадағы әрекеттерін сынау жиі антисемитизмге айналып, өздерін қауіпті сезінетініне шағымданады.

Колумбия университетінің раввині бұған дейін еврей студенттеріне кампустан уақытша аулақ болуға кеңес берген.