Полиция Бостондағы Солтүстік-Шығыс университеті мен Аризона мемлекеттік университеті алаңындағы шатырлы лагерьлерді таратты
Полиция Бостондағы Солтүстік-Шығыс университетінің кампусында палестиналықтарды қолдаған жүзге жуық шерушіні ұстады, деп хабарлайды Sarbaz.kz dw.com сайтына сілтеме жасап.
Оқу орнының мәлімдемесі бойынша екі күн бұрын басталған студенттер шеруіне Солтүстік-Шығыс университетіне байланысы жоқ адамдар еніп кеткен. Ақпаратқа сәйкес, наразылық білдірушілер ұсталғанға дейін түнде демонстранттардан «еврейлерді өлтіріңдер» деген сөздер естілген.
Біз кампуста мұндай өшпенділікке шыдай алмаймыз, – деп мәлімдеді университет.
Университетте мәртебесін растайтын жарамды жеке куәлігін көрсете алған студенттер ұсталмағаны атап өтілді. Олар «тәртіптік жауапкершілікке» тартылады.
Массачусетс штатының полициясының мәліметінше, 25 сәуірден бері құрылған шатырлы лагерьде барлығы 102 адам ұсталған.
Сонымен қатар, 27 сәуірге қараған түні Аризона мемлекеттік университетінің аумағында тағы 69 адам ұсталды. Шерушілер тобы 26 сәуірде кампуста «рұқсат етілмеген лагерь» құрды және бірнеше рет таратылу туралы бұйрықты елемеді, деп түсіндірді штат шенеуніктері.
Олардың мәліметінше, наразылық білдірушілердің басым бөлігі студенттер де, оқытушылар да, білім мекемесінің қызметкерлері де емес.