Қақтығыс басталғалы бері 24 мыңнан аса палестиналық қаза болған
Фото: Фото Sameh Rahmi / NurPhoto via Getty Images
Еуропарламент алғаш рет Газа секторында ХАМАС пен Израильарасындағы атысты толықтай тоқтатуға шақырды. Депутаттар Таяу Шығыстағы жағдайды тұрақтандыруды қолдады. Бұл туралы Sarbaz.kz тілшісі Euronews агенттігіне сілтеме жасап хабарлайды.
Бұл қарардың әзірге заңды салмағы жоқ. Ол Страсбургтегі пленарлық отырыста 131 қарсы, 72 қалыс қалған және 312 дауыспен қолдау тапты.
Португалдық социал-демократ Педро Маркеш Газа секторындағы жағдайға байланысты пікір білдірді.
«Газа секторы жермен-жексен болды. Соғысты тоқтататын кез келді. Таяу Шығыста және осы екі ел арасында ұзақ мерзімді бейбітшілікті құру үшін тиісті гуманитарлық қолдау мен қадамдарға жағдай жасайтын уақыт келді. Бұл соғысты тоқтатып, бейбітшілік орнататын кез келді», – дейді ол.
Газаның денсаулық сақтау министрлігі ХАМАС пен Израиль арасындағы қақтығыс басталғалы бері 24 мыңнан аса палестиналық қаза болғанын мәлім етті.