Келісімшарт құны 1,58 миллиард евроны құрады
Фото: Breaking Defence
АҚШ-тың Lockheed Martin компаниясы 10 қаңтар күні Словакияға төртінші буындағы F-16 Block 70 жойғыш ұшақтарының алғашқы екеуін ресми түрде жеткізгенін мәлімдеді. Бұл туралы Sarbaz.kz тілшісі Breaking Defence-ке сілтеме жасап хабарлайды.
Компанияның мәлімдемесінде бұл «елдің қорғаныс қабілетін нығайтудың сенімді қадамы» деп атап өтілді.
Ұшақтардың алғашқы партиясы Словакияға 2024 жылдың ортасынан кейін жеткізіледі, ал толықтай 2025 жылға дейін жалғасады.
2018 жылдың желтоқсанында 1,58 миллиард еуроға (1,8 миллиард доллар) 14 ұшаққа келісім жасалған. Бұл Словакияның қорғаныс саласындағы ең қымбат техникаларының бірі болып саналады.
Block 70 жойғыштары Northrop Grumman APG-83 электронды сканерлеу антеннасы радарымен (AESA) және ерекше дисплеймен жабдықталған.
Айта кетейік, Ресей мен Украина арасындағы соғыс басталғаннан кейін Block 70 ұшақтарына қызығушылық ерекше артып келеді.