Премьер-министр Санчестің айтуынша, дипломатиялық түрде тану шілде айына дейін жасалады
фото AP
Испания шілде айына дейін Палестина мемлекетінің тәуелсіздігін мойындайды. Бұл шешім басқа еуропалық мемлекеттер үшін бетбұрыс уақыты болуы мүмкін, деп хабарлайды golosameriki.com сайты.
Испанияның премьер-министрі, социалист Педро Санчес журналистерге Мадрид шілде айына дейін Палестинаның дипломатиялық жолмен тәуелсіздігін мойындайтынын айтты.
Бұл жоспарды Сыртқы істер министрі Хосе Мануэль Альбарес растап, ол тәуелсіз Палестинаның БҰҰ-ға кіруіне көмектесетінін айтты.
Мұндай шешім қабылдауға Израильдің World Central Kitchen ұйымына шабуылы түрткі болды. Оқиға салдарынан 7 гуманитарлық қызметкер қаза болды. Бұл оқиға Испанияның наразылығын тудырды.
Премьер-министр Санчес израильдік әріптесі Биньямин Нетаньяхудың Израиль әскерилері гуманитарлық қызметкерлерді «байқаусыз» өлтіріп алғаны туралы жауабын «жеткіліксіз» және «қабылданбайды» деп атады.
Айта кетейік, World Central Kitchen үкіметтік емес ұйымын әйгілі испаниялық-америкалық аспаз Хосе Андрес басқарады.