Сейсенбіде Кипр портынан шыққан гуманитарлық көмек кемесі Газа жағалауына жетті
REUTERS
Жұма күні кешке анклав аймағына 200 тоннаға жуық азық-түлік салынған контейнерлер түсірілді, деп хабарлайды Sarbaz.kz ВВС сайтына сілтеме жасап.
Азық-түлік жер және әуе арқылы да жеткізіліп жатыр, алайда Газа секторының қажеттіліктерін қанағаттандыру үшін қазіргі көмек мөлшері жеткіліксіз.
Теңіз миссиясын АҚШ-тың World Central Kitchen (WCK) қайырымдылық ұйымы ұйымдастырды. Оның негізгі қаржылық доноры – Біріккен Араб Әмірліктері, ал кемені испаниялық қайырымдылық ұйымы ұсынды.
Гуманитарлық көмектің бірінші партиясына күріш, ұн, бұршақ дақылдары, консервіленген көкөністер және консервіленген ақуыздар кірді.
Қазіргі уақытта WCK Газада өте қажет көмектің екінші партиясын дайындауда. БҰҰ мәліметі бойынша қазір аймақта бүкіл халық аштыққа ұшырап жатыр.
World Central Kitchen негізін қалаушы, атақты аспаз Хосе Андрестің айтуынша, барлық азық-түлік 12 жүк көлігіне жүктелді.
Айта кетейік, қазір анклавта жұмыс істейтін порт жоқ, сондықтан жүкті қабылдау үшін уақытша айлақ салынды. Ол үшін қираған ғимараттардың сынық бөліктері мен материалдары пайдаланылды.