Швеция НАТО-ға ресми түрде қосылып, Солтүстік Атлантикалық альянстың 32-ші мүшесі болды
AFP
Швеция Премьер-министрі Ульф Кристерссон мен СІМ басшысы Тобиас Биллстрем АҚШ Мемлекеттік хатшысы Энтони Блинкенге ратификациялау құжаттарын тапсырды. Осылайша соңғы екі жылға созылған процесс аяқталды, деп хабарлайды ВВС сайты.
Жақсы нәрселер күткендерге келеді, – деді Блинкен құжаттарды қабылдап.
Дүйсенбіде Альянстың Брюссельдегі штаб-пәтерінде Швеция туы көтеріледі деп күтілуде.
Бұл тарихи күн. Енді Швеция Альянстың саясаты мен шешімдерін қалыптастыруда тең дауыс беру құқығымен НАТО-ның келіссөздер үстелінде өзінің заңды орнын алады, - деді НАТО Бас хатшысы Йенс Столтенберг.
Швеция өткен сәуірде НАТО-ға кірген Финляндиямен бірге Ресейдің Украинаға басып кіруіне жауап ретінде бейтараптықтан бас тартуға және одаққа қосылуға шешім қабылдады.
Екі ел бір уақытта қосылуға өтініш берді, бірақ Швецияның қосылуы Түркия мен Венгрияның ұстанымына байланысты созылып кетті.
Венгрия Парламенті 26 ақпанда Швецияның қосылуын мақұлдады. Осы аптада құжатқа елдің жаңа президенті Тамаш Шуйок қол қойды. Түркия өз келісімін қаңтар айының соңында берген еді.
Осылайша 200 жыл бойы ешқандай әскери альянстарға кірмеген Швеция Ресейдің Украинаға басып кіруінен кейін НАТО-ға қосылды.