Ақтөбе қаласында өтіп жатқан ХІ халықаралық «Айбын-2025» әскери-патриоттық жастар жиынында Қазақстан Республикасы Қарулы Күштері Әскери-теңіз күштерінің «Жас теңізшілер» әскери-патриоттық клубының тәрбиеленушілері табысты өнер көрсетті.
Пневматикалық винтовкадан ату бойынша өткен жарыста 19 команданың арасынан үздік шығып, 3-орынды иеленді. Бұл нәтиже – жас патриоттардың тыңғылықты дайындығы мен әскери машықтарының жоғары екенін дәлелдеді.
Жиын жетекшісі, 1-сыныпты старшина Болат Райымханов:
«Жас патриоттардың басын қосқан «Айбын» жиынында теңізшілеріміздің дайындығы жоғары деңгейде. Пневматикалық қарудан ату сайысында шапшаңдық пен дәлдікті көрсетіп, жүлделі орынға ие болдық. Алда да үздік нәтиже көрсетуге дайынбыз», – деп атап өтті.
«Айбын» жиыны – жасөспірімдердің әскери-патриоттық тәрбиесін нығайтатын, Отанға деген сүйіспеншілігін арттыратын маңызды алаң.
Биылғы жиын Ұлы Жеңістің 80 жылдығы мен Кеңес Одағының Батыры, қазақтың қаһарман қызы Әлия Молдағұлованың 100 жылдығына арналды.