Кеңес Одағының Батыры Әлия Молдағұлованың 100 жылдығына орай Талдықорған қаласындағы физика-математика бағытындағы Назарбаев Зияткерлік мектебінде мектепаралық «Үздік командир» атты әскери-патриоттық байқау өтті.
Байқауға осы іс-шараны ұйымдастырушы мектеппен Талдықорған дарынды балаларға арналған «Білім-инновация» мамандандырылған лицей-интернатының оқушы командирлері қатысты. Байқау үш кезең бойынша өткізілді: «Білекті бірді жығар, білімді мыңды жығар» - сұрақтарға-жауап, «Автоматты жартылай бөлшектеу және жинау реті», «Күш атасын танымас» - кеудені жерден көтеру (отжимание, қыздарға пресс).
«Үздік командир» байқауына қатысушыларға әділ баға беріп, олардың көрсеткіштерін бағалаған әділқазылар алқасында 54380 әскери бөлімнің сержанты 2-сыныпты сержант Қайрат Аубакиров және Жетісу гарнизоны баспасөз қызметінің сержанты аға сержант Еламан Сайлауов болды.
Байқаудың қорытындысы бойынша:
«Үздік командир – 2025» атығына «Bilim - Innovation» лицейінің жоғары сынып оқушысы Умар Айдос ие болса, 1-орынды Назарбаев Зияткерлік мектебінің жоғары сынып оқушысы Алиева Аяулым алды, 2-орынды Назарбаев Зияткерлік мектебінің оқушысы Құрақбай Мырзабек иемденсе, 3-орынды Назарбаев Зияткерлік мектебінің оқушысы Ермуханбетов Амир мен «Bilim - Innovation» лицейінің оқушысы Мырзабек Ұлан бөлісті.
Байқауға қатысушы және «Үздік командир – 2025» атағына ие болған оқушы мен жүлделі орын алған оқушылар сыйлық сертификаттарымен және мектеп директорының дәрежелі дипломдарымен марапатталды.
Айбат Қуанышбаев