Аягөз гарнизонындағы 15701 әскери бөлімінде мектеп оқушылары үшін Ашық есік күні өтті.
Еліміз Қарулы Күштерінің мәртебесін көтеру, әскери мамандықты көпшілікке танымал ету әрі жас патриоттарды тәрбиелеуді мақсат еткен шараға қаладағы №3 жалпы орта білім беретін мектептің 11-сынып оқушылары қатысты. Олар әскери бөлім сарбаздарының казармаларын көрді. Әскерилердің күнделікті тыныс-тіршілігіне де қанықты. Оқу нүктелерінде бөлім офицерлері мен сержанттары қару-жарақ түрлерін көрсетті.
Әскери бөлім командирінің тәрбие және идеологиялық жұмыстар жөніндегі орынбасары подполковник Рахатбек Адылбеков болашақ Отан қорғаушыларды әрқашан алға қойған мақсаттарға қол жеткізуге, оқуда және спортта жеңіске жетуге шақырды. Сонымен қатар салауатты өмір салтын ұстанып, еліміздің бетке ұстар азаматы болуына тілек білдірді.
Мектеп мұғалімдері мен оқушылары әскери қызметшілерге қонақжайлығы үшін алғыстарын айтты.
Алуа ИСКАКОВА